LOADING

Type to search

تحليل الهيموجلوبين بمعامل التحاليل الطبية

اجهزة قياس الهيموجلوبين بالدم اخر الاخبار مقالات علمية

تحليل الهيموجلوبين بمعامل التحاليل الطبية

Share

تحليل الهيموجلوبين

…..كل يوم بنسمع شكاوى بسبب تحليل الهيموجلولين الهيموجلوبين دايما عالى معايا …لأ رافع جرام …لأ انا بزبطه على جهاز الCBC … لأ الفاكتور بتاعى غير الفاكتور بتاع الشركه ….وهلم جرا………
__________________________________

والحقيقه إن تحليل الهيموجلوبين فعلا – وان كان أشهر التحاليل وأكثرها شعبيه وأبسطها من حيث الخطوات ويمكن من اول تستات الكيميا اللى بيتعلمها المتدرب – إلا انه تحليل خاااص جدا وسط كل تحاليل الكيمياء الروتينيه ، ومليان بالنقاط الفنية اللى لو م اخدتش بالك منها هتكون فعلا بتعمل كل الحيل اللى تخللى نتايجك غالبا أعلى وأحيان تانيه أقل من الحقيقه وانت مش دريان😀
_________________________________

فطبيعة العينة بتاعته نفسها مختلفه عن عينات باقى التستات اللى غالبا سيرم او بلازما او بول واللى بنتعامل فيها مع مواد دايبه وصغيره
انما ف حالة الهيموجلوبين الموضوع مختلف حبتين او شوية حبوب :
* أولا احنا بنتعامل مع عينة دم كاااامل بكامل مكوناته وخلاياه و لزوجته و مشاكله كمان
* ثانيا بنتعامل تقريبا مع معلق مش مواد دايبه ف ميه
* ثالثا احنا من بين الغابة الكثيفه دى بنستهدف مادة موجوده جوا نوع من انواع الخلايا دى مش حره ف البلازما
بجمع التلات حاجات دول مع المشاكل اللى ممكن تبقا موجوده كمان ف بلازما العينه وأخطاء جمع العينه والشغل: نكون حصلنا على مركب من المشاكل ؛ واللى هتفرض علينا تعامل / تعاملات خاصة واحنا شغالين التيست كل وحده على حده
أضف الى ذلك بالمره مشكلة المشاكل وهى طريقة حسابه او الطريقة اللى بيتم حساب تركيزه بيها وهى الفاكتور الجاهز او الثابت النظرى اللى بييجى مع بمفلت الشركه واللى غالبا 36.77 واللى 90% من المعامل شغاله بيه ، وغياب عملية المعايره المنضبطه أو القيام بيها بشكل خاطئ وغير مرجعى وعدم توفر كنترولات للمتابعه الدوريه و……
___________________________________________

نحو بروتوكول منضبط لتحليل الهيموجلوبين

هنا باذن الله هحاول أحط هيكل عظمى أو رسم كروكى لبروتوكول مرجعى دقيق منظم بسيط سهل كل المعامل تنفذه
هنقف فيه باذن الله على كل خطوه او أقل من خطوه ف الطريقة الأشهر ( طريقة الهيموجلوبين سيانيد أو درابكن ) واللى تعتبر الجولد استاندر لتحليل الهيموجلوبين – وان كان هناك طرق اخرى لقياسه / حسابه أدق سواء ف الفلو أو الإيمدج سيتوميترى- ولكن هي الطريقة الاكثر انتشارا ف المعامل على مستوى العالم وهيا الل تهمنا لان كلنا شغالين بيها .
……على علم يقين ان هذا الهيكل لن يكسى لحما الا بالمشاركة والمناقشة والاضافة والحذف والتعديل والتعقيب من حضراتكم
————————————————————————-

البروتوكول
1- جمع العينه :
—————–
* مفيش تقريبا تعليمات خاصة أو اضافيه لسحب عينة الهيموجلوبين – نفس التعليمات العامه بتاعة السحب هنراعيها – خللى بالك من وقت ربط الترنكيه عشان الهيموكونسنتريشن ودايما خللى انبوبة الاديتا ف الاخر سواء هتسحب بسرنجه او فاكوتينر ، ولو هتسحب بسرنجه وتفرغ ف انبوبه فاكيوم ياريت تسيب الانبوبه هيا اللى تسحب الدم من السرنجه من غير مساعدة حضرتك

* العينة الاستاندر بتاعتنا على مانع التجلط (الاديتا) بنسبة 25 ميكرون لكل 1 مل دم لو هنستخدم اديتا سايله وياريت منكترش الاديتا عن كدا ، ولو هنسحب على انابيب جاهزه يبقى لحد العلامه تماما وزى م قلنا ف بوستات فلم الدم جهز انابيب بتركيزات مختلفه من الاديتا او خللى عندك انابيب مينى عشان الكميات الاقل ومفاجآت السحب

* نقلب العينه تلات مرات على الأقل تقليب مش رج بحيث العينه تتقلب من فوق لتحت والعكس

* لو هتشتغل على طول والعينه فريش طبعا أحسن ف كل الحالات ؛ لكن هنا بنقول سيب العينه وليكن عشر دقايق قبل م تشتغل الهيموجلوبين عشان تراقب حاجتين مهمين : –
الاولانيه حجم البافى كوت ف العينه و التانيه درجة عكارة البلازما ؛ عشان النقطتين دول هيفرضوا علينا إجراءات
خاصة هنتكلم عنها ف وقتها باذن الله

🔴🔴 (( الهيموجلوبين ثابت معانا ف العينه 24 ساعه مش اكتر لو هنحفظ العينه ف التلاجه حسب اخر تعليمات ))

2 – تحضيرات قبل الشغل :
——————————
* هتلبس أدوات الوقاية الشخصيه ( أقللها خالص الجلفز المطاط وبلاش البلاستيك خالص عشان تتحكم ف مسك الانابيب وفتح الغطيان كويس )
* هتفرش منطقة الشغل ع البنش طبعا بفوطه أدوات ودا ضرورى عشان البنش ميتلوسش بالدم من الببتات او غطيان الانابيب لما تفتحها وترجع تغسل وتطهر (( زى م قلنا قبل كدا الفوطه ب 35 قرش ))
* هتجهز أدواتك المعروفه للجميع واللى عباره عن
انابيب وزرمان بلاستيك أو زجاج حسب نظام كل معمل وغطيان أنابيب
* ببتات ولااااااااابد تكون ثابته للشغل متتغيرش والا هتعمل كلبريشن لو غيرتها يفضل برده تكون ببتاتك من النوع الثابت يعنى 10 او 20 ميكرون ثابته وببته كبيره لسحب الريجنت سواء زجاج بفلتر او اوتوماتيك ((( وممنوع منعا بااااتا استخدام الفم ف سحب الريجنت ))) أضعف الايمان ركب سرنجه 10 ع الببته الزجاج واستخدمها زى الببته الاوتوماتيك ،
تبسات نوعيات نضيفه بلاش استخسار ( الانواع المحترمه ف التعليقات للى مش عارف )
* حامل الانابيب
* مناديل ورقيه غير شخصيه ( مينفعش قطن )
* سنترفيوج وياريت يكون بعيد عن جهاز الكيميا او مش ع البنش
* جهاز الكيميا بتاعنا ( الفوتو او الاسبكتروفوتوميتر ) سواء يدوى او نص اوتوماتيك
* ريجنت الدرابكن المفضل ليك من النوعيات المحترمه ( اختيارى ف التعليقات للى عاوز ) سواء هتشتغل بمحلول جاهز وثابت او هتشتغل بمحلول بيتحضر وكل نوعيه لها احتياطات خاصه ولكن من رأيى لو هتسخدم محلول غير جاهز يبقا خليك ف النوعيات اللى الريجنت بتاعها عباره عن محلول واحد مش اتنين
* جهاز قياس pH ( ف نوعيات كتير رخيصه منها بحوالى 250 جنيه ) أو على اقل تقدير شرايط كيميا البول التلاته
* محلول استاندر هيموجلوبين ( هنوضح هنجيبه ازاى او هنعمله ازاى)
* كنترول هيموجلوبين ( هنحضره ف المعمل برده )

3 – طريقة الشغل :
——————–
هنسمى بسم الله
* أول حاجه هنعمل كلبريشن لكل حاجه هنشتغل بيها ( ببتات & ريجنت & جهاز & سستم او برنامج القياس & درجة حرارة المعمل ….)

…هنتأكد من درجة حرارة غرفة المعمل اللى شغالين فيه طبعا بترمومتر عادى او ديجيتال يكون متعلق ف مكان الشغل باستمرار لان مش كل الناس متوفر عندها تكييف  فلو درجة الحراره ما بين 18 الى 25 يبقا تمام ، لو أقل يبقى هزبط الحضانه بتاعتى او الووتر او الدراى باث على درجة حراره ف الرينج دا .
…هتأكد من معايرة الببتات بتاعتى بالذات الصغيره ولابد تكون دقتها 99% او اكتر (( معايرة الببتات ف التعليقات اختيارى للى يطلب ))

…هفتح الجهاز بتاعى واسيبه فتره معقوله قبل م اشتغل وأجهزه على برنامج الهيموجلوبين لو له سوفت وير او ازبط ع الفلتر لو ملوش واشيك على درجة حراراته واغسله اكتر من مره او اغسل الكوفته اكتر من مره بميه مقطره جديده بتاع اليوم ( يعنى مش محطوطه ف كب من امبارح مثلا ) او استخدم ف الفتح والغسيل الاولى ميه معقمه بتاع الحقن .

…هختبر الريجنت بتاعى مباشرة ف انبوبة غير انابيب الشغل لو من النوع المتحضر اشوف درجة لونه وصفاؤه بالنظر ، وأحط فيه شريط pH لازم تكون ف حدود من 7 الى 7.4 ( الخطوه دى نعملها كل اسبوع ) ولو الريجنت بيتحضر يبقى نحضره فريش افضل أقصى حاجه يقعد متحضر اربع ايام ( ف دراسات ثابته بينت تغير كبير ف النتايج لو قعد متحضر اكتر من اربع ايام ) ، كمان هختبر امتصاصه على الجهاز بانى هدخله كعينه بعد م اصفر على ميه مقطره ولو الجهاز بتاعى بيطلب الميه المقطره كبيز لاين قبل البلانك يبقى هشوف امتصاص البلانك  ف الحالتين المفروض يعطى صفر .

…هسطب برنامج للهيموجلوبين على الجهاز او هزبط الجهاز على طول موجى 546 ( كاقرب طول موجى ل 540 )
درجة حرارة الجهاز ع ال R.T عشان تبقا زييها زى الغرفه و لو اشتغلت ف الحضان يبقا ازبط على نفس درجة حرارة الحضان والل هعمله هنا هيفضل ثابت مدة الكلبريشن

الحجم اللى هيسحبه الجهاز هخليه اقل حاجه 800 ميكرون ( هنا بنزود الحجم عشان تفادى اختلاط العينه بالعينه اللى قبلها او اختلاطها بالميه المقطره للناس اللى بتغسل بين العينات فالأكثر منطقيه هوا غسل الفلوسيل بالعينه اللى هقرأها

هكريت استاندرد كيرف او كلبريشن كيرف على الجهاز لو بيدعم استاندر اكتر من نقطه او هعمله على شيت اكسيل ع الكمبيوتر او هعمله على ورقة رسم بيانى زى زمان لو بستخدم جهاز منوال اززاى؟؟
 الاول هوفر عندى محلول استاندر بتركيز عالى وعشان للاسف مفيش حاليا استاندر هيموجلوبين مزبوط ف السوق المصرى ومفيش شركات موفره الاستاندر الدولى ICSH HiCN standard
اللى هوا ال primary standard بتاع الهيموجلوبين ( باذن الله نجيبه قريب ) وهوا دا اللى بيستخدم ف المعامل مباشرة او بيتعمل على أساسه الاستاندرات التجاريه secondary standard ، ومفيش معامل مركزيه بتقوم بدورها الحقيقى اللى دا جزء منها

…..عشان شوية الموافيش دول فاحنا هنحاول نحل مشكلتنا دى بأضعف الايمان و كل منطقه حسب ظروفها وامكانياتها وتكون ف نفس الوقت مرجعيه ، وهنا لازم الزملا المحترمين اصحاب الخبره والمعامل الكبيره تشاركنا وتقوم بدور المعامل المرجعيه كل واحد ف منطقته .

… الاستاندر الى هنستخدمه هوا عينه هيومان عاديه معمولة على جهاز ف نفس اليوم اللى الجهاز معمول له كلبريشن وكنترول فيه ويكون ف نفس منطقتك أو ف مكان حكومى لو مكان محترم ويكون تركيز العينه دى عالى مفيش يبقى تنقص من البلازما 50 ميكرون وتقيس لغاية م توصل للتركيز المطلوب أو حواليه ،
وهتراعى الظروف المثاليه وانت بتنقل العينه الاستاندر لمعملك اللى هتعمل فيه الكلبريشن ف نفس الوقت عشان ضمان الجوده .
احنا بنختار عينة تركيزها عالى لهدف اننا نعمل منها تركيزات مختلفه براحتنا
دلوقتى هنشتغل العينه دى هيموجلوبين ولازم تثبت طريقة شغلك كاملة

يعنى لو هشتغل باتنين مل على عشره ميكرون يبقى هشتغل كل عيناتى بعد كدا اتنين على عشره وكذلك لو اشتغلت باتنين ونص على عشره او اشتغلت باربعه على عشرين ميكرون او خمسه على عشرين ميكرون
..انت حر ف الكميه اللى هتختارها لشغلك أهم حاجه تبقى فاهم التخفيف كام ومختار الكميات المناسبه لأدواتك اللى تضمن أقل أخطاء .

1- هجهز ست أنابيب وأرقمهم وأحط ف الانبوبه رقم ((2)) 5مل من الريجنت وأسيبها تاخد درجة حرارة التفاعل
2 – هقلب العينه تقليب كويس لمدة دقيقه بانتظام وهدوء بحيث الأنبوبه تتقلب وتتعدل
3 – هاخد بالببته عشرين ميكرون من العينه واتأكد انهم فعلا عشرين ميكرون لانى باستخدم نفس نوع التبس اللى استخدمته وانا بعاير الببته🚫 ونااااخد بالنا ان الدم غير البلازما غير الميه اللى عايرت بيها يعنى ممكن أعاير الببته تمام ع الميه المقطره وتشتغل ف السيرم والبلازما برده تمام وتيجى ف الهيموجلوبين وتسحب كميه أقل من العشره أو العشرين ؛ ودا سببه ان ممكن السوسته بتاع الببته ضعفت فتشتغل ف السوائل الخفيفه كويس انما مع السوائل اللزجه ومنها الدم متشتغلش مزبوط😨
3 – باستخدام قطعة منديل ورق همسح التب من بره من جميع الاتجاهات بمسحه واحده (( موضحه ف الصور 👇👇)) لان الحكايه كلها عشرين ميكرون فلو ان التب شايل بس من بره اتنين ميكرون واحد كفيل انه يعللى النتيجه 10% من قيمتها
4 – ف الانبوبه رقم 2 هنزل بالتب للاخر وهنزل الدم ف المحلول وهغسل التب فيه اكتر من مره
5 – هغطى الانبوبه بغطا وهقلبها مرتين او تلاته يعنى هخللى تحتها فوق وفوقها تحت ويمكن دا التست الوحيد اللى الكتب بتشدد ع النقطه ومش بتكتفى انها تقول اعمل ميكس ودا معروف سببه طبعا ان كمية المحلول كبيره غير اى تست تانى .
💥بعد عشر دقايق هيكون معانا استاندر هيموجلوبين بالتركيز اللى احنا مختارينه وليكن 20 g/dl
6 – ف الانبوبة رقم ((1)) هحط ريجنت بس وأخليها للبلانك
7 – ف الانابيب الاربعه التانيين هنخفف من الاستاندر بتاعنا بالريجنت بتاع الهيموجلوبين زى م هو مفصل ف الجدول المرفق تحت
8 – كدا بقا معانا بلانك وخمس استندرات بتركيزات ( 4 ، 8 ، 12 ، 16 ، 20 )
9 – زى م قلنا : لو هشتغل على جهاز بيدعم مالتى بوينت هسجل التركيزات ع الجهاز وهيطلبهم منى تباعا فهدخلهم والجهاز هيكريت الاستاندرد كيرف ويحفظه ويبقا جاهز ، ولو بتشتغل على جهاز منوال يبقا هتقرأ امتصاص كل تركيز من الخمسه وتسجله قصاده ف جدول وترسم الكيرف بتاعك على ورقة رسم بيانى وتعلقها قدامك او تعملها على ورقة اكسل لو بتعرف تتعامل معاه .

ف التلات حالات احنا الوقتى جاهزين اننا نحسب تركيز اى عينة هيموجلوبين بطريقة سليمه وبأقل نسبة خطأ .
🔴شغلك للعينات هوا نفسه شغلك لعينة الاستاندر اللى عملتها بكل تفصيله وكل خطوه وخليك دايما ف الاحجام الكبيره عشان معدل الخطأ يقل

هنزود بس خطوه صغيره معملنهاش ( لحكمه ) ف شغلنا للاستاندر وهى اننا بعد انتهاء العشر دقايق مدة التفاعل هندور العينات ف السنترفيوج 5 دقايق على سرعة مناسبه تلافيا لاى جزيئات كبيره أيا كان نوعها ممكن تشتت المسار الضوئى وترفع القراءات بالخطأ

 الجزيئات دى كدا كدا موجوده ف كل العينات نتيجة بقايا تكسير كرات الدم وموجوده بنسب اكبر طبعا ف العينات اللى كرات الدم البيضا فيها مرتفعه

بعض الكتب بتقول اننا بعد انتهاء التفاعل نفلتر العينه بفلتر 0.2 ميكرون لنفس الهدف عشان كدا احنا استعضنا بخطوة السنتره عن هذه الخطوه لعدم توفر الفلاتر دى

وانت بتسحب العينه بالساكشن خللى بالك دايما من الخرطوم انه بيسحب من فوق وحذااااااار انه ينزل لقاع الانبوبه ويسحب منها  دا سبب رئيسى من اسباب ارتفاع النتايج بالخطأ ولك ان تتخيل ان عينه ترتفع من 11 ل 12.5واكتر ف تجارب تانيه😨 والفرق بس ف مكان سحب العينه من الانبوبه

🕠مدة استخدام الكلبريشن ساريه لحين تغير اى عامل من العوامل اللى اشتغلنا عليها زى تغيير جهاز الكيميا او اى جزء من أجزاؤه خصوصى طبعا اللمبه او هتغير نوعية الريجنت اللى هتشتغل بيه وطول المدة دى طبعا هنشيك بكنترول بلاش كل يوم وخلينا نقول كل تلات ايام ف الصيف او كل اسبوع ف الشتا وهنسجل نتايجه كل مره
🚫🚫طب الكنترول دا نجيبه منين؟؟؟😨
أقوللك :

الكنترول دا هنحضره عندنا ف المعمل بامكانيات بسيطه وكلها موجوده ومتاحه ف معاملنا باذن الله
انا هنزل الطريقه والخطوات مفصله فلو عندك خبره ف الموضوع دا وتقدر تعمله يبقا خير ، معندكش استعداد او مستصعب الموضوع فيبقا زى م قلنا ف الاول كل منطقه فيها زميل خبره عليه واجب انه يقوم بالدور دا ويحضر كميه كبيره لزملاؤه اللى حواليه خصوصى ان الموضوع تكلفته تاااافهه ومدة حفظه طويله تقدر بالشهور ف التلاجه واعوام ف الفريزر

باختصار احنا هنعمل hemolysate من دم بشرى وهناخد اللى يهمنا منه وهنرمى الباقى 😃 يعنى هنستخلص الهيموجلوبين وباقى المكونات زى الصفايح والخلايا البيضا وبقايا الكرات الحمرا والدهون وخلافه هنتخلص منه
دى خطوه ..
الخطوه التانيه هنضيف اضافات للتثبيت واطالة المده
ملحوظه : من اهم العوامل لنجاح التحضير دا هوا التعقيييييييم لازم جو معقم قدر الامكان وبقول قدر الامكان اهو
نبدأ :

1 – هنجيب كمية دم مناسبه حسب الحاجه وليكن 10 مل دم خالى من الفيروسات يفضل يكون هيموجلوبينه مرتفع على مانع تجلط cpda كافضل اختيار او اى مانع اخر زى الاديتا او الهيبارين ، لو هجيب من كيس دم يبقى ف انابيب فاكيوم بلان ولو هسحب يبقى هعمل حسابى من تطهير مكان السحب واسحب فاكوتينر برده
2 – هدور العينه بتاعتى ف سنتر (مفروض انه خاص) كبديل هنعقم السنتر بتاعنا قبله بانابيبه بكلور اولا ثم استريليم
2 – هتخلص من البلازما كاملة وطبقة البافى كوت معاها
3 – هغسل الكرات الحمرا بانى هضيف نفس حجمها سلاين وهدور خمس دقايق
4 – هكرر عملية الغسيل مرتين لحد م اتأكد انى اتخلصت من البلازما تماما
5 – هضيف نفس حجم الكرات المكدسه اللى عندى ميه معقمه بتاع الحقن وياريت نكون حطيناها مده ف التلاجه ف درجة حراره منخفضه
6 – هضيف نص حجم الكرات المكدسه كلوروفورم وطبعا مش متاح للجميع هنجيب مكانه تولوين ودا متاح جدا ومتوفر ورخيص وهنضيف منه 0.4 من حجم الكرات المكدسه ، أضعف الايمان خاالص لو معرفتش تتحصل ع التولوين كمان يبقى مفيش حل قدامنا غير استخدام الزيلين ( الزيلول ) ودا متاح جدا وموجود ف معظم المعامل ( وان كان بروتوكول استخدامه ف مسح العدسات اتغير )
7 – لمدة ساعة كاملة هنعمل عملية رج عنيف جدا للانابيب باستخدام شيكر او باى طريقه المهم رج عنيف لتكسير الكرات الحمرا تكسير كاامل
8 – هنحفظ الانابيب ف التلاجه لتانى يوم وهنحطها مقلوبه يعنى الغطا لتحت
9 – اليوم التالى هندور الانابيب ف السنتر لمدة 20 دقيقه وهيا مقلوبه برده على سرعة على اعلى سرعة عندك
10 – باستخدام سرنجه او سن فاكيوم هتسحب الهيموليسات من الانابيب لانبوبه / انابيب تانيه بلان وهنسيب الطبقتين اللى فوق ( طبقة التولوين والطبقة الصلبه بتاع البقايا والدهون )
11 – هندور تانى لمدة ساعة على اعلى سرعة وبعدها هنفصل حوالى 95 % من الهيموليسات ف انبوبة تانية
12 – هنضيف لكل 7 مل هيموليسات 3 مل جليسرول ( طبعا متاح وببلاش ) وهنقلب كويس جدا
13 – هضيف حوالى نص مل جنتاميسين كمضاد حيوى واسع المجال
14 – هعمل ميكس كويس تانى وهحفظه لمدة اسبوع الاول ف التلاجه قبل اختباره وبعدين هقسمه كميات صغيره ف ابندورفات واحفظه اما ف التلاجه او الفريزر لو عاوز مدة حفظ اطول
15 – هستخدمه ككنترول يومى او زى م اتفقنا وهسجل نتايجه باستمرار ولااازم ال CV بتاعى يكون اقل من 2 % ((( ف التعليقات رابط لموقع مباشر لحساب ال CV
_____________________________________

اللى عنده اى تعقيب او اضافه او تعديل او استفسار يتفضل
واللى استفاد حاجه من الموضوع يدعيلنا دعوه حلوه ويشير ع الجروبات التانيه
……..هذا وبالله التوفيق .. ومنه العون والمدد
منقول بعد موافقة د.محمود سعد صاحب المقال.

شركة بست لاب للتجهيزات المعملية

للاستفسارات والطلبات

فى خمس طرق اختار الاسهل ليك:

1- تشرفنا بمقر شركة بست لاب 21 ش الموارد القصر العينى القاهرة بجوار محطة مترو السيدة زينب.

2- تتصل بنا على الرقم 01204757777 او عبر الواتس اب على نفس الرقم

3 – تزور صفحتنا على الفيس بوك و تعمل فولو للصفحة see first عشان تبقى من الاوائل اللى هيشوفوا العروض بتاعتنا. www.facebook.com/bestlab

4 – تحمل تطبيق بست لاب على موبيلك لتعرف اخر الاخبار لحظة بلحظة

وهو الموقع الاول فى مصر والوطن العربى اللى بيقدم كل الخدمات فى مجال تجهيز معامل التحاليل الطبية.

5 – اتصل بنا   https://www.best-lab.org/contact-us

Tags:

You Might also Like