بلاش الاسطوانة المشروخة دي احنا في عام ٢٠٢٢

بلاش الاسطوانة المشروخة دي احنا في عام ٢٠٢٢
لو مش عارف ليه حضرتك السعر على الخاص أنا هعرف حضرتك بس قبل ما نبلغ حضرتك الأسباب اللي حضرتك تجهلها لازم حضرتك تعرف أن الرد عندنا اوتوماتيك بيوصل لكل الناس خلال ٣ ثواني من كتابة التعليق يعني مش بصورة البروفايل ولا انت منيين ولا اسمك ايه…
اسباب عدم ذكر السعر على العام:
اولا: الاسعار اللي بنكتبها على العام بعد سنة بيجي واحد لاول مرة يشوف المنتج وبيلاقي السعر ومش بيبص على الوقت بتاع الاعلان وبيتصل عشان يشتري المنتج على السعر اللي هو شافه ( من سنة ) واحنا نبلغه أن السعر ده مش موجود حاليا وأنه من فترة طويلة يتهمنا بردوا أننا بنخدع الناس بأسعار وهمية وكدابين.
وطبعا الموضوع ده مش موجود في المحلات اللي حضرتك بتتكلم عليها لأنها بتحط سعر اليوم كل يوم.
ثانيا: حضرتك مش صاحبي عشان ابعت لحضرتك على الخاص بس بردوا أنا عارض المنتج وحضرتك طلبت تعرف السعر وانا الطريقة الاسرع بالرد على كل طلبات معرفة السعر بيكون الرد الالي على الخاص اللي بيحتفظ لحضرتك بالسعر في رسالة مع حضرتك تقدر ترجعها في أي وقت لان وسط بوستات وإعلانات كتير على الفيسبوك ممكن حضرتك متقدرش ترجع تاني للاعلان اللي حضرتك شوفته عندنا أو عند غيرنا عشان كدة الخاص مهم.
ثالثا: عدم ذكر السعر على المنتج بيخلي الاعلان يوصل للمهتمين فقط بالمنتجات يعني لو المنتج مش مهم لحضرتك مش هتطلب تعرف السعر إنما لو المنتج يهم حضرتك بتسئل عند وهو ده العميل اللي احنا بنهتم بالرد عليه على الخاص.
رابعا: افترضنا أن السعر معلن وحضرتك عايز تطلب المنتج حضرتك هتبعت بياناتك الشخصية على العام في كومنت ولا هتبعتها على الخاص للتواصل ؟؟ اكيد حضرتك هتدخل على الخاص (رغم أن حضرتك مش صاحبي) لان الخاص مش للصحاب بس كمان للشغل.
واخيرا وليس اخرا استخدام السوشيال ميديا في الدعاية وعرض المنتجات مختلف عن الدعاية التقليدية في المحلات اختلاف كلي لان ظهور الاعلان لحضرتك وللجمهور المشابه بيتحدد حسب اهتمامات حضرتك وتفاعلك مع الاعلانات من خلال كومنت او لايك او شير.
(لو السعر مكتوب حضرتك مش هتعمل اي تفاعل على البوست) وبالتالي مش هتظهر لحضرتك إعلانات جديدة حول نفس المنتج.
غير طبعا أن في منافسة في كل المجالات وأحيانا كثيرة مش بتكون منافسة شريفة لان المنافس بيحاول يعرف اسعارك عشان يضاربك وخلاص.
الخلاصة متحاولش تتهم حضرتك الناس بأي شي غير لما تعرف وجهة نظرهم في الأمر.
وللعلم في ناس كتير محترمة بتبعتلنا على الخاص نفس كلام حضرتك بأسلوب ارقى وبنرد عليهم بردوا على الخاص ومعظمهم بيقتنعوا بوجهة النظر دي اللي هي في الأساس مش وجهة نظرنا احنا دي وجهة نظر كل المسوقين بالسوشيال ميديا المحترفين.
اخيرا .. النصيحة على الملاء فضيحة .. وفضيحة لصاحب النصيحة لو كان الرد بيبين جهل الناصح.
نعتذر على طول الرد ..
وشكرا لاهتمام حضرتك بمنتجاتنا. 😊

للتواصل مع شركة بست لاب يمكنكم الاتصال بنا عبر الخط الساخن الخاص بالشركة 01204757777
او التواصل على الواتساب على الرابط : https://wa.link/eu1d8d
كما يمكنكم زيارة مقر شركتنا على العنوان : 21 ش المواردي القصر العيني القاهرة – مصر
ويمكنكم الوصول الينا عبر اللوكيشن على الخريطة على الرابط : https://goo.gl/fPUuku
مستعدين للرد على كل استفساراتكم